Ishq mein mere koi Rayat ni milny wali

عشق میں کوئی رعایت نہیں ملنے والی
سوچنے کی بھی اجازت نہیں ملنے والی

حُسن قاضی ہے، محبت ہے وکیلوں میں سے
اِس عدالت سے ضمانت نہیں ملنے والی

کوئی دُرہ، کوئی کوڑا، کوئی چابک لاؤ
ہم کو لفظوں سے نصیحت نہیں ملنے والی

اپنی ہمت سے کوئی حشر بپا کر ڈالو
مانگنے سے تو قیامت نہیں ملنے والی

کام سمجھو گےتو پھرعشق نہ کر پاؤ گے
ایسے بے گارکی اجرت نہیں ملنے والی

حال یہ ہی جو رہا امتِ مسلم تیرا
تجھ کو دنیا کی امامت نہیں ملنے والی

ملنا گر ہو تو طبیعت کا بہانہ کیسا
سچ ہے یہ، آپ کی نیت نہیں ملنے والی

عشق جب ہو ہی گیا ہے تو تڑپنا کیسا
اس سے زیادہ تو اذیت نہیں ملنے والی

اب تو ساغرؔ کی طرح مرنا پڑے گا
زندہ رہتے ہوئے شہرت نہیں ملنے والی